Yon nouvo kanpay sibè atak ki lye ak sèvis entèlijans Ris yo fè anpil bri nan mond sekirite enfòmatik la. Daprè plizyè ekspè nan sibèsekirite, pirat yo rive pran kontwòl plizyè milye «routeurs» entènèt atravè mond lan san anpil moun pa remake.
Atak sa a konsidere kòm youn nan operasyon espyonaj dijital ki pi diskrè ak danjere nan dènye ane yo.
Kijan atak la ap fèt?
Gwoup pirat yo, ke ekspè yo rele APT28, itilize feblès ki nan ansyen routeurs pou pran kontwòl yo. Routeurs sa yo souvan pa mete ajou oswa yo deja genyen pwoblèm sekirite.
Yo vize sitou routeurs mak tankou TP-Link ak MikroTik. Lè yo pran kontwòl routeur a, pirat yo kapab:
chanje paramèt entènèt la (DNS)
redirije trafik entènèt itilizatè yo
entèsepte modpas ak idantifyan koneksyon
Metòd sa a pèmèt yo fè sa yo rele “Adversary-in-the-Middle attack”, kote yo ka obsève oswa manipile kominikasyon entènèt la san viktim nan pa remake.
Plizyè dizèn milye aparèy deja enfekte
Daprè rechèch sibèsekirite, kanpay pirataj la te kòmanse depi ete 2025 epi li deja enfekte plizyè dizèn milye routeurs atravè mond lan, ak konpwomèt omwen anviwon 20 000 aparèy.
Objektif prensipal la se:
vòl modpas
espyonaj dijital
aksè a imèl ak kont sèvis sou entènèt
Gen rapò ki montre plis pase 200 òganizasyon ak plis pase 5 000 aparèy te deja afekte nan operasyon an.
FBI lanse yon operasyon pou bloke atak la
Pou konbat menas la, Federal Bureau of Investigation (FBI) ansanm ak patnè entènasyonal yo lanse yon operasyon pou dekonekte routeurs ki te pirate yo.
Operasyon sa a te ede:
idantifye routeurs ki enfekte
rekipere kontwòl sou kèk nan yo
koupe aksè pirat yo te genyen sou rezo yo
Malgre sa, ekspè yo avèti ke anpil routeurs toujou vilnerab.
Siw ta renmen metrize Baz Excel pou jere kalkil, depans, bidjè oubyen ou bezwen pi byen konprann kòman pou w kapab itilize Excel dokiman sa ap ede w . Kontakte kounya pou w ka rezève pa w la.
Kijan ou ka pwoteje routeur ou
Ekspè sekirite yo rekòmande kèk mezi senp pou evite vin viktim:
1. Mete routeur la ajou ak dènye «firmware» li.
2. Chanje modpas pa defo routeur a.
3. Dezaktive aksè administrasyon a distans si ou pa bezwen li.
4. Itilize Otantifikasyon milti-faktè (MFA) pou sèvis enpòtan.
5. Si routeur la twò ansyen, pi bon solisyon an se ranplase li.
Sibè atak sa a montre yon fwa ankò ke aparèy rezo ki parèt san danje yo kapab tounen zouti espyonaj. Routeur yo souvan bliye nan sekirite enfòmatik, men yo kapab bay pirat yo aksè dirèk sou tout trafik entènèt yon kay oswa yon òganizasyon.
Se poutèt sa, kenbe ekipman rezo yo ajou ak sekirize vin tounen yon eleman esansyèl nan sekirite dijital jodi a.
Sous
01net – atik sou Sibè atak routeurs
Reuters – rapò sou operasyon FBI kont rezo pirataj la
Microsoft & NCSC
rapò sekirite sou atak APT28
MJT Blog 