Sekrè pou reyisi nan yon entèvyou travay: kisa pou fè e kisa pou evite

Entèvyou travay se yon etap enpòtan nan lavi nenpòt moun k ap chèche travay. Malerezman, anpil moun fè erè ki ka koute yo opòtinite yo t ap tann. Atik sa a pral eksplike w etap pa etap sa w dwe fè pou prepare w pou yon entèvyou travay, e sa w dwe evite pou asire ou reyisi.

1. Preparasyon anvan entèvyou a

a) Chèche enfòmasyon sou konpayi an

• Asire w ou konnen non konpayi an, domèn li ap travay ladan, ak valè li yo.
• Vizite sit entènèt yo, gade pwofil sou rezo sosyal yo, epi aprann sou pwodwi oswa sèvis yo.

b) Konprann pozisyon ou aplike pou li

• Li anons travay la avèk atansyon.
• Prepare w pou eksplike kijan konpetans ou ak eksperyans ou ka benefisye konpayi an.

c) Prepare repons pou kesyon komen

• « Pale m de ou »: Pratike yon repons kout ki mete aksan sou fòs ou yo.
• « Poukisa ou vle travay avèk nou? »: Fè lyen ant valè konpayi an ak objektif ou.
• « Pale m de yon fwa ou te rezoud yon pwoblèm »: Chwazi yon egzanp ki montre kapasite w pou rezoud pwoblèm.

2. Sa pou fè pandan entèvyou a

a) Rive alè

• Planifye pou rive omwen 15 minit anvan entèvyou a kòmanse.
• Verifye kote entèvyou a pral fèt ak mwayen transpò w ap itilize.

b) Abiye selon pozisyon ou aplike pou li

• Chwazi yon ten ki pwòp ak pwofesyonèl.
• Evite rad ki twò chòk oswa akseswa ki twòp (zanno, bag, mont, goumèt ak lòt ankò).

c) Kominike avèk konfyans

• Mache ak kè poze .
• Fè kontak vizyèl ak moun k ap fè entèvyou a.
• Pwojte yon ton vwa ki klè e konfyan.

d) Poze bon kesyon

• Demontre enterè w nan pozisyon an lè w mande kesyon tankou:
  • « Kisa yon jounen tipik sanble nan pozisyon sa a? »
  • « Ki jan konpayi an sipòte devlopman pwofesyonèl anplwaye li yo? »

3. Erè pou evite pandan entèvyou a

1. Pa prepare w ase

• Si w pa konnen anyen sou konpayi an oswa pozisyon an, sa ka fè moun ki fè entèvyou a wè w kòm yon moun ki pa serye.

2. Pale twòp oswa twò piti

• Rete kout ak repons ou yo, men bay ase detay pou montre konpetans ou.

3. Kritike ansyen patwon ou oswa kolèg ou yo

• Sa ka fè moun ki ap fè entèvyou a wè w kòm yon moun negatif.

4. Pale sèlman de salè oswa benefis

• Konsantre sou kijan ou ka kontribye nan siksè konpayi an anvan ou diskite sou salè.

4. Sa pou fè apre entèvyou a

a) Voye yon mèsi

• Imedyatman apre entèvyou a, voye yon imèl mèsi bay moun ki te fè entèvyou a. Remèsye yo pou opòtinite a epi raple yo kijan ou entèrese nan pozisyon an.

b) Analize pèfòmans ou

• Reflechi sou sa ki te mache byen ak sa ou ta ka amelyore pou pwochen fwa.

c) Fè swivi si ou pa resevwa repons

• Si yo pa kontakte w nan tan yo te pwomèt, voye yon lòt imèl pou swivi.

Prepare w byen pou yon entèvyou travay se kle pou reyisi. Mete aksan sou fòs ou yo, kominike avèk konfyans, epi evite erè komen yo. Sonje, yon entèvyou se pa sèlman yon opòtinite pou konpayi an evalye ou, men tou yon chans pou ou wè si pozisyon an se yon bon pou ou.